Մարտ 26, 2016
Հարկայնությո՞ւն թե բարձրություն
Իհարկե բարձրություն:
Իսկ հարց է առաջանում, ինչու ոչ հարկայնություն:
Որովհետեւ հարկայնությունը քաղաքաշինական կարգավորման չափորոշիչ լինել չի կարող:
Ու ես պնդում եմ դա:
Փորձեմ օրինակով բացատրել:
Պատկերացրեք նախագծում եք հանրակացարանի շենք`
1.65մ հասակ ունեցող չինացիների համար հարկի բարձրությունը գուցե նախատեսեք 2.70մ, իսկ եթե 1.80-անոց իռլանդացիերի համար, գուցե եւ անեք 3.20մ բարձրությամբ հարկեր։
Հիմա եթե զոնինգը սահմանափակի հարկայնությունը, ասենք ոչ ավել քան 10 հարկ, կստացվի որ իռլանդացիների 10 հարկանի հանրակացարանը 5 մետր ավելի բարձր կլինի քան չինացիներինը։
Ահա թվաբանությունը եւ պարզաբանող գծագիրը:
2.70մ x 10 = 27 մետր, իսկ 3.20մ x 10 = 32 մետր:
Հանրակացարան չինացիների եւ իռլանդացիների համար
Ուրեմն կստացվի որ իռլանդական հանրակացարաններով կառուցապատված թաղամասը ավելի քիչ լուսավորված կլինի կամ այլ կերպ ասած, այդ թաղամասի փողոցները ավելի քիչ լույս կստանան։
Ինչպես կասեր նախագահը` Տարոն, սիրուն չի’:
Բայց այդպես չի կարելի, քանի որ շենքերի բարձրության սահմանափակումը առաջ է քաշվել քաղաքում հավասարաչափ լուսավորվածություն ապահովելու համար: Իսկ լուսավորվածությունը քաղաքի կարեւոր չափանիշներից մեկն է:
Ահա , նայեք ստորեւ բերված լուսանկարը:
Տարբեր տարիներին բայց նույն բարձրությամբ շենքեր
Ինչպես նկատում եք, ձախ նորակառույցը ունի հարկերի տարբեր բարձրություններ, բայց շենքի ընդհանուր բարձրությունը, ճիշտ-ճիշտ համապատասխանում է աջակողմյան շենքի կառնիզին: Ճարտարապետը շենքի մասշտաբը խոշորացնելու նպատակով ռիթմը լուծել է երկու հարկի բարձրություն որպես մեկ հարկ: Բայց ընդհանուր բարձրությունը միեւնույն է ճիշտ-ճիշտ նույնն է ինչ ձախակողմյանինը: Ու դա կախարդանք չի, կամ ինչպես կասեն ոմանք «կառնիզի գիծը պահած ա»: Ո’չ: Պարզապես երկու շենքերն էլ գտնվում են նույն թաղամասում, որտեղ ըստ Զոնինգի նախատեսված է այդ բարձրությունը:
Ու հարյուր տարի այս թաղամասում շենքերը քանդվելու ու կառուցվելու են ենթարկվելով բարձրությունը սահմանափակող նույն համընդանուր կանոնին:
Գրում եմ ու ամաչում թե ինչ պրիմիտիվ բաներից եմ խոսում, բայց արի ու տես, որ Երեւանի զոնինգում այդ հարցը հստակ սահմանում չունի:
Մեզ տարիներով տենց են սովորեցնել ու մինչեւ հիմա Հայաստանում քաղաքաշինական հարցերից խոսում ու նախագծում են նշելով շենքերի հարկայնությունը:
Բնակիչներն էլ բողոքելիս խոսում են շենքի հարկերի քանակի շատ կամ քիչ լինելու մասին:
Մարդիկ բնազդորեն հասկանում են որ բարձրահարկ շենքը կփակի իրենց բակի կամ փողոցի լույսը, բայց ինչպես ցույց տվեցի գծագրում երկու միանման 10 հարկանի շենքերը կարող են ունենալ 5 մետր բարձրության տարբերություն: Իսկ դա լույսի համար էական ա:
Էսքան բան…